Një ngjarje e rëndë ndodhi mbrëmjen e së premtes në Fier, ku Xhuliano Miho vrau me thikë 23-vjeçarin Xhimi Bakaj, bashkëjetuesin e ish-bashkëshortes së tij.
Tragjedia thellohet pasi gruaja, që kishte filluar një jetë të re me Bakajn, ishte shtatzënë. Kjo u konfirmua nga vëllai i viktimës në një intervistë për “Shqipëria Live” në Top Channel, duke shtuar se ky mund të ketë qenë një shkak për vrasjen.
Vëllai i viktimës deklaroi se disponon një video ku Miho kërcënonte Bakajn me jetë. Xhimi Bakaj u godit disa herë me thikë, ndërsa Miho, 39 vjeç, u arrestua dhe pranoi krimin.
Miho dhe gruaja 33-vjeçare, me të cilën kishte dy fëmijë, ishin ndarë prej 9 muajsh. Megjithatë, ai nuk e pranoi asnjëherë ndarjen dhe lidhjen e saj të re me Bakajn, çka çoi në konflikte të shumta, duke kulmuar me vrasjen e së premtes.