Një ngjarje e rëndë ka tronditur sot fshatin Kullollas të Gramshit, ku një 80-vjeçar ka humbur jetën si pasojë e asfiksimit, pasi ndezi zjarr në kopshtin e banesës së tij. Sipas njoftimit zyrtar të Policisë, flakët dolën shpejt jashtë kontrollit dhe u përhapën në disa fshatra të zonës, duke shkaktuar një situatë emergjente.
Tymi ka mbuluar një hapësirë të gjerë deri në afërsi të Cërrikut, ndërsa katër fshatra — Kullollas, Bletëz, Menkollar dhe Shimër — kanë pësuar dëme të konsiderueshme nga përhapja e zjarrit.
Shërbimet e Policisë, Zjarrfikëses dhe Emergjencave Civile kanë mbërritur menjëherë në terren, ku vijojnë përpjekjet për shuarjen e flakëve dhe evakuimin e banorëve. Grupi hetimor, nën drejtimin e Prokurorisë, po punon për të zbardhur të gjitha rrethanat dhe shkakun e ngjarjes.
Kjo është viktima e parë nga zjarret për këtë vit në Shqipëri.