Policia greke ka çmontuar një rrjet kriminal ku të përfshirë rezultojnë tre priftërinj ortodoksë, të cilët bashkëpunonin me një organizatë shqiptare për trafikimin e kokainës, kanabisit dhe transportin e emigrantëve të paligjshëm.
Njëri prej priftërinjve, 46 vjeç, i njohur gjerësisht në rrjetet sociale si “Youtuber”, publikonte video si model, këngëtar dhe kuzhinier, ndërkohë që në prapaskenë ishte i angazhuar në veprimtari kriminale. Ai është një nga tre klerikët e arrestuar në operacionin e gjerë policor që synonte goditjen e grupit.
Sipas hetimeve, priftërinjtë bashkëpunonin ngushtë me një grua 52-vjeçare – e identifikuar si drejtuesja e bandës – dhe një 42-vjeçar shqiptar. Klerikët shërbenin si transportues të drogës dhe kujdeseshin për ruajtjen dhe shpërndarjen e saj.
Agjencia Kundër Drogës zbuloi se sasi kokaine dhe kanabisi fshiheshin edhe brenda një kishe në rrugën Liosion, ku 46-vjeçari i shiste klientët drejtpërdrejt, madje edhe i veshur me petkun fetar. Një pjesë tjetër e trafikut realizohej në oborrin e kishës.
Prifti i dytë, 40 vjeç, u arrestua në Rodos pasi mori një valixhe që përmbante 2.188 kg kokainë, të cilën ia dorëzoi një shqiptari 38-vjeçar.
Ndërsa prifti i tretë, 52 vjeç, ndodhet tashmë në burgun e Komotinit, pasi u kap më 6 shtator në Rodope duke transportuar gjashtë emigrantë të paligjshëm të futur nga kufiri greko–turk.
Hetimet zbuluan aktivitetin paralel të 46-vjeçarit si personazh televiziv, model pasarela, pjesëmarrës në emisione gatimi dhe në projekte muzikore, duke krijuar një profil publik të dyfishtë para se të zbulohej roli i tij në trafikun e drogës.
Gjatë operacionit u sekuestruan 2,238 gramë kokainë, 9,092.6 gramë kanabis i papërpunuar, si dhe 4,380 euro dhe 24,500 lekë shqiptarë në para të gatshme.