Policia Kombëtare spanjolle arrestoi dy shtetas shqiptarë në provincën Cádiz, pasi i gjeti të armatosur me pushkë automatike Kallashnikov (AK-47) duke ruajtur rreth një ton kanabis në një banesë në zonën Pelayo, Algeciras.
Sipas burimeve të hetimit, droga kishte mbërritur në Cádiz përmes plazheve të Algecirasit dhe Tarifës, duke përdorur anije të rrjeteve të trafikut të drogës. Banesa e përdorur nga organizata kriminale ishte identifikuar si një depo ruajtjeje, e njohur nga policia si “çerdhe”, ku fshihen sasi të mëdha lëndësh narkotike.
Gjatë ndërhyrjes, agjentët sekuestruan tre pushkë automatike Kallashnikov, të mbushura dhe të gatshme për përdorim, ndërsa dy të arrestuarit u paraqitën mëngjesin e 9 dhjetorit para Gjykatës së Detyrës në Algeciras, ku u caktua masa e sigurisë arrest me burg.
Autoritetet spanjolle e cilësojnë përdorimin e këtij armatimi nga rrjetet e trafikut të drogës si shumë shqetësues, duke vënë në dukje një rritje të dhunës dhe përdorimit të armëve të zjarrit në Campo de Gibraltar, zonë strategjike për rrugët ndërkombëtare të drogës. Sipas policisë, kjo tregon një nivel të lartë specializimi dhe kapacitet operacional të këtyre organizatave, duke rritur ndjeshëm rrezikun për qytetarët dhe efektivët e rendit.