Greqia është përfshirë këtë të martë nga kushte të rënda atmosferike, të shoqëruara me temperatura ekstreme, reshje intensive shiu dhe dëborë në zona të ndryshme të vendit.
Autoritetet greke kanë shpallur alarm në të paktën shtatë rajone, ndërsa shkollat janë mbyllur në qarkun e Atikës, përfshirë Athinën. Për shkak të situatës së rënduar dhe emergjencave civile, kryeministri Kyriakos Mitsotakis ka anuluar gjithashtu udhëtimin e planifikuar drejt Forumit Ekonomik Botëror në Davos.
Moti i keq ka prekur më rëndë zonën e Korinthit, ku reshjet e rrëmbyeshme kanë shkaktuar përmbytje të mëdha dhe dëme të shumta. Pamjet nga zonat e prekura po qarkullojnë gjerësisht në rrjetet sociale. Probleme të konsiderueshme janë raportuar edhe në Thesali, në bregdetin Jonian, si dhe në pjesën lindore të vendit.
Në Gjirin e Korinthit, reshjet e dendura të shiut kanë sjellë përmbytje të përhapura, ndërsa banorët raportojnë se uji u derdh brenda një kohe shumë të shkurtër, duke marrë me vete mbeturina dhe duke e bërë zonën të pakalueshme.
Presidenti i Bashkësisë Lokale të Korfuzit, Giorgos Pitsas, në një deklaratë për Korinthostv.gr, e cilësoi situatën si veçanërisht serioze dhe bëri thirrje që zona të shpallet në gjendje të jashtëzakonshme.