Kryetari i Bashkisë së Rrogozhinës, Edison Memolla, është vetëdorëzuar sot në Policinë e Kavajës, pas vendimit të Gjykatës së Apelit të Posaçëm që e shpalli fajtor për korrupsion aktiv në zgjedhje, kryer në bashkëpunim.
Memolla u dënua me 1 vit burg dhe gjykata i hoqi edhe të drejtën për të ushtruar funksione publike për 5 vite.
Sipas Prokurorisë së Posaçme, ai akuzohej se gjatë zgjedhjeve të pjesshme lokale më 6 mars 2022, kishte ndikuar tek elektricisti Blerim Xhamani, me qëllim që të mos ndërpriste energjinë elektrike për një abonent debitor, në mënyrë që gruaja e këtij abonenti të votonte në favor të tij. Edison Memolla kishte garuar në ato zgjedhje nën siglën e Partisë Socialiste.