Në mbledhjen e datës 17 prill, Këshilli i Ministrave miratoi vendimin që përcakton rregullat e reja për kohën e punës, pushimin dhe trajtimin financiar të punonjësve të Policisë së Shtetit.
Sipas vendimit, efektivëve që nuk e marrin lejen vjetore për shkak të detyrave, do t’u kompensohet ajo financiarisht sipas gradës dhe funksionit. Gjithashtu, orët shtesë do të paguhen në bazë të një kalendari të përcaktuar, që dallon ndërmjet orëve të ditës dhe të natës.
Punonjësit nuk duhet të punojnë më shumë se 8 orë në ditë pa ndërprerje dhe duhet të kenë të paktën një ditë pushimi në javë.
Vendimi sjell edhe lehtësira për gratë shtatzëna në radhët e Policisë, të cilave u jepet e drejta për të marrë leje pa pagesë për arsye personale ose shëndetësore, një herë në vit.
Këto ndryshime vijnë me propozim të Ministrisë së Brendshme dhe Drejtorisë së Përgjithshme të Policisë së Shtetit.