Ministria e Arsimit në Itali ka njoftuar një masë të re që do të hyjë në fuqi pas pushimeve verore: ndalimin e përdorimit të telefonave celularë gjatë orëve të mësimit edhe për maturantët.
Derisa më parë ndalimi i telefonave ishte i aplikueshëm kryesisht për nxënësit deri në moshën 15 vjeç, tani ky kufizim do të shtrihet edhe tek klasat e fundit të shkollës së mesme. Përjashtime të veçanta mund të pranohen vetëm në raste të nevojave specifike, si për nxënës me aftësi të kufizuar.
Ministri i Arsimit, Giuseppe Valditara, i cili përfaqëson partinë e djathtë ekstreme “Lega”, argumentoi se kjo masë synon t’i bëjë mësimet më të qeta dhe të përqendruara, duke u mbështetur në studime që tregojnë ndikime negative të përdorimit të tepërt të telefonave në shëndetin dhe performancën e nxënësve.
Telefonat celularë do të duhet të fikën para fillimit të çdo ore mësimi, ndërsa ndalimi i mëparshëm, i cili shpesh nuk respektohej në mënyrë rigoroze, do të zbatohet më rreptë.
Kjo nismë vjen në një kohë kur kontrolli i përdorimit të pajisjeve mobile në shkolla është çështje e debatit në shumë vende evropiane. Ministria e Arsimit, e cila që nga viti 2022 quhet edhe Ministria e Arsimit dhe Meritës nën qeverinë e kryeministres Giorgia Meloni, dëshiron me këtë vendim të theksojë rëndësinë e arritjeve akademike dhe disiplinës në shkolla.