Kryetari i Bashkisë së Tiranës, Erion Veliaj, ka shpërndarë një lajm të rëndësishëm për qytetarët përmes një postimi në rrjetet sociale, duke njoftuar se shumë shpejt do të fillojë ndërtimi i një parkimi të ri nëntokësor pranë sheshit “Shopen”, në hyrje të Parkut të Liqenit.
Veliaj thekson se, gjatë 10 viteve të fundit, janë ndërtuar gjashtë parkime nëntokësore në kryeqytet, përfshirë atot te Sheshi “Skënderbej”, Bulevardi i Ri, ish “7 Xhuxhat”, te Kopshti Zoologjik dhe sheshi “Italia”. Ai gjithashtu përmend krijimin e disa vendparkimeve mbi tokë, si dhe vendosjen e një kushti që çdo ndërtim i ri në qytet të ketë dy kate parkim për rezidentët.
“Puna jonë nuk ndalet këtu. Ndaj, jam shumë i lumtur që do t’i shtojmë Tiranës edhe një tjetër parkim te sheshi ‘Shopen’, për banorët e Njësisë 5 dhe vizitorët e Parkut. Po ashtu, mezi pres të mbarojmë parkimet nëntokësore që po ndërtojmë te Teatri i Ri dhe sheshi ‘Avni Rustemi’. E di që parkimi është një problem për qytetarët, por kjo mund të zgjidhet vetëm me punë dhe jo me fjalë”, ka deklaruar Veliaj.