Një vendim i High Court of England and Wales ka ndezur debat në Britani, pasi 70 emigrantëve që kanë aplikuar deri më tani do t’u paguhet nga 6,600 paund secilit si kompensim për telefonat celularë të konfiskuar nga autoritetet britanike të emigracionit.
Emigrantëve, të cilët mbërritën me gomone në brigjet angleze përmes kalimeve të paligjshme në Kanalin e La Manshit, u ishin marrë pajisjet për t’u ç’koduar dhe për të nxjerrë të dhëna që, sipas autoriteteve, do të ndihmonin në luftën kundër rrjeteve të trafikimit.
Deri tani, fatura e kompensimeve arrin rreth gjysmë milioni paund, ndërsa mbi 1,300 persona të tjerë janë në pritje të shqyrtimit të kërkesave. Nuk ka ende një shifër të saktë për numrin total të emigrantëve të prekur nga kjo praktikë.
Vendimi gjyqësor erdhi pas një padie kundër politikës së ndjekur nga autoritetet e emigracionit në periudhën prill–nëntor 2020. Sipas gjykatës, emigrantëve u ishte bërë presion për të dorëzuar telefonat dhe për të zbuluar kodet e aksesit, ndërsa të dhënat personale përdoreshin për analiza inteligjence dhe ruheshin në databazën “Project Sunshine”.
Praktika e konfiskimit masiv të pajisjeve elektronike u aplikua në një kohë kur kalimet me gomone po rriteshin ndjeshëm. Kulmi u arrit në vitin 2022, kur rreth 40 mijë persona në vit kaluan përmes La Manshit drejt Britanisë. Shumë prej tyre u sistemuan fillimisht në kampin e Manstonit, pranë Doverit.
Vendimi ka ngjallur reagime të forta politike. Ish-zëvendësministri i Emigracionit në qeverinë konservatore, Robert Jenrick, aktualisht pjesë e Reform UK të udhëhequr nga Nigel Farage, e cilësoi situatën si një “farsë” dhe deklaroi se partia e tij do të synojë të ndalojë zbatimin e vendimeve të gjykatave evropiane nëse vjen në pushtet.
Ndërkohë, një zëdhënës i Home Office tha se kompensimet janë pasojë e politikave të mëparshme të qeverisë konservatore, e cila nuk është më në pushtet. Aktualisht, qeveria britanike ka miratuar legjislacion që e bën të ligjshëm konfiskimin e telefonave dhe pajisjeve elektronike në raste të tilla.