Këngëtarja Altuna Sejdiu, e njohur si Tuna, mbajti një fjalim të ngarkuar me emocione gjatë përkujtimores së Shpat Kasapit, artistit që humbi jetën javën e kaluar pas një arresti kardiak.
Në kujtimet e saj, Tuna u kthye pas në kohë, te fëmijëria, rrugëtimi i përbashkët dhe sfidat e para të famës:
“Unë dhe ti Shpat ecëm nëpër shumë rrugë bashkë… ishim shokë klase, fëmijë të bekuar me prindër që na mbështetën në ëndrrat tona. Ishim adoleshentë që provuam barrën e popullaritetit para se ta kuptonim ç’do të thoshte ajo… dhe ia dolëm.”
Ajo theksoi se Shpati la pas një trashëgimi që do të mbetet e gjallë në zemrat e shqiptarëve:
“Ti ia dole… kënga jote jehon në çdo qytet, në çdo shtëpi, në çdo zemër ku flitet shqip. Le muzikën që do të mbajë emrin tënd të gjallë përherë.”
Në fund, artistja dha një premtim të ndjerë për të birin 3-vjeçar të Shpatit, Roelin:
“Dhe nëse një ditë Roeli vendos të ngjitet në skenë, unë do të jem aty. Do ta mbështes, ashtu si dikur që ne mbështetëm njëri-tjetrin. Ky është premtimi im për ty.”