Jakup Krasniqi deklaroi në gjykimin që po zhvillohet në Hagë se lufta e Ushtria Çlirimtare e Kosovës (UÇK) kishte si synim çlirimin e Kosovës dhe ndërtimin e një shoqërie demokratike, jo shkatërrimin e ndonjë kombi tjetër.
Gjatë fjalës së tij, ai theksoi se akuzat e ngritura ndaj tij dhe bashkëluftëtarëve janë, sipas tij, “vazhdim i gënjeshtrave të prodhuara nga regjimi kriminal i Serbisë”. Krasniqi u shpreh krenar për veprimtarinë e tij politike, duke shtuar se gjithmonë ka qëndruar në anën e lirisë dhe dinjitetit njerëzor.
Ai kujtoi se krimet dhe persekutimet e kryera nga forcat serbe janë pjesë thelbësore e kontekstit historik dhe nuk mund të ndahen nga veprimet që po shqyrtohen në gjykatë. “Ato nuk janë në sfond, por të shkruara në historinë publike me shkronja të mëdha”, u shpreh ai, duke kërkuar nga trupi gjykues që të mos “ngatërrojë pasojën me shkakun”.
Sipas Krasniqit, lufta për liri nuk ishte një rast i izoluar, por pjesë e përpjekjeve historike të kombeve që kanë kërkuar çlirim nga shtypja. Ai theksoi se e drejta ndërkombëtare njeh të drejtën e popujve për vetëvendosje dhe për t’u mbrojtur nga persekutimi sistematik.
“Populli ynë kurrë nuk ka kërkuar shkatërrimin e një kombi, etnie apo feje tjetër. Ne luftuam për jetën, lirinë, demokracinë, barazinë dhe drejtësinë”, tha ai, duke nënvizuar se qëllimi ishte rikthimi i Kosovës te qytetarët e saj për të jetuar me dinjitet.
Në përfundim, Krasniqi kërkoi nga gjykata që provat dhe dëshmitë të shqyrtohen me objektivitet, duke shtuar se qëndron para drejtësisë “i përgjegjshëm dhe i pafrikësuar për të vërtetën”.