Mediat italiane kanë publikuar identitetin dhe foton e të riut shqiptar që u qëllua për vdekje nga një biznesmen në Itali gjatë një tentative të dyshuar për vjedhje.
Rivaldo Rusi, 25 vjeç, banues në Francolise, humbi jetën në orët e para të së hënës, pasi së bashku me dy bashkëkombas të tjerë dyshohet se hyri me forcë në vilën e biznesmenit italian Aurelio Valiante, 58 vjeç, në zonën e Cilento-s, afër Salernos.
Sipas hetimeve, Valiante ka rrëfyer se ka marrë një pushkë gjahu dhe ka qëlluar, duke vrarë në vend 25-vjeçarin dhe duke plagosur rëndë një tjetër shqiptar 28-vjeç, i cili ndodhet në spital në gjendje të rëndë. Personi i tretë nga grupi është ende në arrati.
Pas krimit, biznesmeni ka tentuar të fshehë trupin e viktimës, gjë që rëndon edhe më tej pozitat e tij ligjore. Ai tashmë përballet me akuzat për vrasje, fshehje kufome dhe plagosje të rëndë.
Ndërkohë, në vendlindjen e të ndjerit në Sant’Andrea del Pizzone, dhimbja është e madhe. Dhjetëra shqiptarë janë mbledhur pranë familjes për të shprehur ngushëllimet. Rivaldo Rusi lë pas një bashkëshorte të re dhe një djalë të vogël.