Një ekzekutim i ftohtë ndodhi mbrëmjen e djeshme në Shkodër, ku 34-vjeçari Kristian Kola u qëllua për vdekje sapo doli nga një hotel në qytet.
Pak minuta më herët, Kola kishte parkuar makinën përpara lokalit dhe ishte futur brenda për të takuar një mik. Sapo dolën së bashku, mbi të ra breshëria e armëve të zjarrit.
Pranë hotelit ndodhej një motor i zi, nga ku një person hapi zjarr me saktësi, duke lënë të vdekur Kolën, ndërsa shoku i tij shpëtoi pa lëndime. Hetuesit dyshojnë se autorët kishin bashkëpunëtor që i informonte për lëvizjet e viktimës.
Burime policore thonë se ekzekutimi mban shenjat e një vrasësi profesionist, pasi nuk pati dëme anësore, edhe pse në zonë kishte shumë kalimtarë.
Kola, i cili drejtonte një firmë ndërtimi së bashku me babanë e tij, nuk rezulton të ketë pasur konflikte të njohura, ndërsa motivi i ngjarjes mbetet ende mister.