TIRANË– Orët e para të kësaj të marte në një darkë familjare në Rrugën e Kavajës në Tiranë, mbetën të plagosur 3 persona.
Nga njoftimet paraprake u tha se qitja me armë zjarri ka ndodhur aksidentalisht, por tashmë Policia e Shtetit ka publikuar njoftimin zyrtar pas hetimeve të bëra dhe ka rezultuar se shtetasi E. E., 32 vjeç, është në kërkim për veprën penale “Plagosja e rëndë me dashje.
NJOFTIMI I PLOTË I POLICISË:
Në vijim të informacionit paraprak të dhënë mëngjesin e sotëm, ju informojmë se:
Në vijim të veprimeve të shpejta hetimore, nga Sektori për Hetimin e Krimeve të Rënda në DVP Tiranë, është bërë i mundur dokumentimi i plotë i autorësisë së ngjarjes, dhe si rezultat: – u shpall në kërkim shtetasi E. E., 32 vjeç, për veprën penale “Plagosja e rëndë me dashje”, parashikuar nga neni 88/2 i Kodit Penal;
– u arrestuan shtetasit A. D., 38 vjeç, dhe D. Z., 35 vjeç, të dy banues në Tiranë, për veprën penale “Veprime që pengojnë zbulimin e së vërtetës”, kryer në bashkëpunim, parashikuar nga neni 301/25 i Kodit Penal.
Gjithashtu, gjatë kryerjes së veprimeve procedurale, si dhe këqyrjes së kamerave të sigurisë, është bërë e mundur gjetja e armës së zjarrit pistoletë TT, e cila dyshohet se është përdorur gjatë ngjarjes. Pas kryerjes së krimit nga shtetasi E. E., dy të arrestuarit, i kanë marrë armën e zjarrit dhe më pas e kanë fshehur atë, me qëllim pengimin e zbulimit të veprës penale dhe të autorit të saj. Materialet i kaluan Prokurorisë.
Paraditen e sotme gjithashtu u mësua se 32-vjeçari që ka plagosur tre personat gjatë darkës familjare dhe është shpallur në kërkim, është Edison Elezaj, 32 vjeç, djali i biznesmenit Hajri Elezaj, i njohur si pronar i “Ujit Lajthiza”.
Elezaj mbante armë pa leje, ndërsa të plagosurit, E. P., 36 vjeçe, A. P., 36 vjeç, dhe D. P., 34 vjeç, janë çuar në një spital privat për t’iu nënshtruar trajtimit të mjekëve, si pasojë e dëmtime të shkaktuara nga arma e zjarrit.