PRISHTINË-Moderatori i njohur nga Kosova, Alaudin Hamiti ka reaguar për herë të parë pas incidentit të ndodhur sot, ku u raportua se ishte sulmuar fizikisht nga një person teksa ecte në rrugë.
Pas publikimit të videos që qarkulloi gjerësisht në rrjetet sociale dhe shkaktoi shqetësim tek publiku, moderatori ka vendosur të sqarojë situatën përmes një reagimi të drejtpërdrejtë. Në deklaratën e tij të bërë gjatë Prime-t të sotëm në “BBVK”, Alaudini ka falënderuar të gjithë ata që i kanë shkruar dhe kanë shprehur mbështetje, duke konfirmuar se incidenti ka ndodhur, por se gjendja e tij shëndetësore është e mirë.
“Dua të falënderoj të gjithë ata që më kanë shkruar sot. Po, ka ndodhur një incident, por unë jam mirë. Në momente të tilla, njeriu reagon për të mbrojtur veten dhe kjo është ajo që ka rëndësi. Sonte jemi këtu për spektakël, andaj le të fokusohemi te ajo që na bashkon të gjitheve.”- është shprehur ai.
Ai nuk ka dhënë detaje shtesë rreth identitetit të personit që e sulmoi apo motiveve që çuan në këtë përplasje, duke lënë të kuptohet se situata është menaxhuar. Pavarësisht ngjarjes, Alaudini ka bërë të ditur se do të jetë prezent në prime-in e mbrëmjes, duke theksuar se fokusi duhet të mbetet tek spektakli.
Reagimi i moderatorit ka qetësuar ndjekësit, ndërsa publiku pret të shohë nëse do të ketë ndonjë koment apo zhvillim të mëtejshëm gjatë transmetimit të mbrëmjes./Radar.al