Pas fitores historike të Shqipërisë ndaj Serbisë me rezultatin 0-1, një nga momentet më të komentuara ishte ndëshkimi me karton të verdhë i autorit të golit, Rey Manaj, pas festës me gjestin e shqiponjës.
Presidenti i FSHF-së, Armand Duka, sqaroi sot arsyen zyrtare të ndëshkimit, duke theksuar se kartoni nuk lidhej me simbolin kombëtar, por me mënyrën se si u zhvillua festa.
“Manaj dhe çdo futbollist tjetër mund të festojnë me shqiponjë sa herë të duan dhe asnjëherë s’do të ndëshkohen për këtë. Rasti konkret është ndëshkuar sepse festa u bë para pankinës së ekipit kundërshtar, çka mund të interpretohej si provokim,” – tha Duka në një intervistë për Blendi Fevziun.
Kreu i FSHF-së shtoi se rregullorja e FIFA-s parashikon ndëshkim me karton të verdhë vetëm në rastet kur lojtari provokon kundërshtarin, heq fanellën ose nxit reagime nga publiku.
“Festat me shqiponjë nuk janë dhe nuk do të jenë kurrë të ndëshkueshme. Kartoni ishte vetëm për shkak të vendndodhjes së festës,” – përfundoi Duka.