Autoritetet britanike kanë nisur një operacion të gjerë kërkimi për një azilkërkues etiopian që u lirua gabimisht nga burgu, ndonëse ishte dënuar për sulme seksuale ndaj një vajze 14-vjeçare dhe një gruaje në qytetin Epping, qarku Essex.
I dyshuari, Hadush Gerberslasie Kebatu, ishte dënuar më herët këtë vit me 12 muaj burg, pasi u shpall fajtor për dy akuza për sulm seksual, tentativë për sulm seksual, nxitje të një vajze të mitur për marrëdhënie seksuale dhe ngacmim pa dhunë.
Gjatë seancës së dënimit në shtator, gjykatësi Christopher Williams paralajmëroi se Kebatu “përbën një rrezik të konsiderueshëm për përsëritjen e veprës”.
Lirimi “aksidental” që tronditi autoritetet
Sipas Sky News, Kebatu u lirua nga burgu HMP Chelmsford, pasi ishte planifikuar që të deportohej menjëherë nga autoritetet britanike të emigracionit.
Megjithatë, për arsye ende të paqarta, transferimi nuk u krye, dhe i dënuari u la i lirë.
Policia e Essex-it njoftoi se gabimi u zbulua të premten, rreth orës 12:57, ndërsa hetimet zbuluan se Kebatu kishte hipur në një tren drejt Londrës nga stacioni Chelmsford në orën 12:41. Treni ndaloi në Shenfield dhe Stratford, përpara se të mbërrinte në stacionin London Liverpool Street në orën 13:18.
Forcat e rendit u bëjnë thirrje qytetarëve që të mos i afrohen të dyshuarit, por të kontaktojnë menjëherë policinë nëse e shohin.