Petrit Pepkola është 35-vjeçari që u dhunua rëndë sot në Lezhë, pas një konflikti që dyshohet se nisi për shkak të një vajze. Ngjarja u regjistrua pranë një pike karburanti, në aksin Lezhë–Rrilë.
Sipas të dhënave paraprake, autorët e kanë ndaluar automjetin me të cilin udhëtonte Pepkola, e kanë nxjerrë me forcë jashtë dhe më pas e kanë goditur disa herë me mjete të forta, mes tyre edhe një shkop bejsbolli.
35-vjeçari mori ndihmën e parë në spitalin e Lezhës, por për shkak të dëmtimeve të rënda u transportua menjëherë në Spitalin e Traumës në Tiranë, ku ndodhet nën kujdes intensiv. Burime spitalore bëjnë me dije se gjendja e tij është e rënduar.
Autorët janë ende të paidentifikuar, ndërsa policia po punon për zbardhjen e plotë të ngjarjes. Fillimisht, Pepkola u tha oficerëve se nuk i njihte agresorët, por më vonë ka pohuar se e njeh njërin prej tyre.
Burime nga grupi hetimor konfirmojnë se 35-vjeçari nuk rezulton person i skeduar më herët, por po verifikohen pista të mundshme për ndonjë konflikt të fundit. Forcat e rendit kanë sekuestruar pamjet e kamerave të sigurisë në zonë për të identifikuar lëvizjet e autorëve.