Komisioni Qendror i Zgjedhjeve vendosi të nisë verifikimin e thelluar për Tonin Marinaj, kryebashkiakun socialist në Malësinë e Madhe të cilën PD e akuzon se ka fshehur të dhënat në formularin e vetëdeklarimit.
Sipas PD-së, në 2016 Prokuroria e Antimafias Italiane ka hetuar Marinaj si drejtues i një organizate kriminale e përbërë prej më shumë se dhjetë anëtarësh, me baza vepruese në Shqipëri dhe Itali, e angazhuar sistematikisht, profesionalisht dhe në vazhdimësi në eksportimin në territorin italian të sasive të mëdha të mariuanës për t’u shpërndarë me pakicë nga anëtarët e organizatës kriminale.
Vendimi u mor sot nga kryetari i KQZ-së Ilirjan Celibashi.
Kreu i Bashkisë së Malësisë së Madhe reagoi duke hedhur poshtë akuzat, ndërsa i konsideroi si një “skenar të dobët frymëzuar nga ndonjë pasdritare”.