Një tërmet me magnitudë 5.0 ballë, ka goditur mëngjesin e së shtunës pjesën lindore të Turqisë, njoftoi Autoriteti për Menaxhimin e Fatkeqësive dhe Emergjencave (AFAD).
Sipas AFAD, lëkundjet u regjistruan rreth orës 06:20 me orën lokale në distriktin Battalgazi të provincës Malatya. Tërmeti është ndjerë edhe në zonat përreth, përfshirë provincat Elazığ, Adıyaman, Tunceli dhe Şanlıurfa.
Deri tani nuk janë raportuar viktima apo dëme materiale. Autoritetet turke deklaruan se nuk ka të dhëna për situata problematike, ndërsa ekipet në terren po vijojnë vlerësimin e situatës.
Turqia konsiderohet një nga vendet më aktive sizmike në botë dhe përballet rregullisht me lëkundje të forta të tokës.
Vendi ka një histori të gjatë me tërmete shkatërruese. Në vitin 1939, tërmeti i Erzincanit shkaktoi rreth 33 mijë viktima, ndërsa tërmeti i Izmitit në vitin 1999 la pas rreth 17 mijë të vdekur.
Në vitin 2023, dy tërmete të fuqishme goditën provincën jugore të Kahramanmaraş, duke shkaktuar më shumë se 53 mijë viktima dhe dëme ekonomike që u vlerësuan në afro 10% të Prodhimit të Brendshëm Bruto të Turqisë për atë vit.