Presidenti amerikan Donald Trump ka hedhur poshtë kërkesën për falje të BBC-së lidhur me skandalin e montazhit të një fjalimi të tij dhe ka paralajmëruar padi ndaj rrjetit britanik. BBC konfirmoi se ka marrë një letër nga ekipi ligjor i Trump dhe se do të përgjigjet “në kohën e duhur”.
Skandali u bë publik pas një hetimi të gazetës The Telegraph, e cila zbuloi se dokumentari i programit “Panorama”, transmetuar tetorin e kaluar, një javë para zgjedhjeve presidenciale në SHBA kishte manipuluar përmbajtjen e një videoje të fjalimit të Trump-it. Sipas një memoje të brendshme 19-faqëshe, programi “e kishte mashtruar plotësisht publikun”.
Në dokumentar, që trajtonte rolin e Trump në ngjarjet e 6 janarit, BBC akuzohet se bashkoi dy pjesë të ndara të fjalimit të tij nga janari 2021. Montazhi krijonte përshtypjen se Trump u bënte thirrje mbështetësve që “të shkonin në Kapitol për të luftuar me zjarr”, ndërsa ishte hequr pjesa ku ai kërkonte “marshim paqësor dhe patriotik”. Në realitet, dy pjesët kishin diferencë kohore prej rreth një ore.
Pas kritikave të ashpra, presidenti i BBC-së, Samir Shah, kërkoi falje publike, duke e cilësuar çështjen si “një gabim në gjykim”.
“Pranojmë se mënyra si u montua fjalimi krijoi përshtypjen e një thirrjeje të drejtpërdrejtë për dhunë. BBC kërkon falje për këtë gabim,” shkruante Shah në letrën drejtuar Komisionit për Kulturë, Media dhe Sport.
Shah mohoi gjithashtu pretendimet se BBC kishte tentuar të fshehë çështjen, duke kundërshtuar akuzat e ish-këshilltarit të pavarur për etikën, Michael Prescott, i cili dha dorëheqjen në qershor duke akuzuar menaxhmentin për mungesë transparence.