Presidenti amerikan Donald Trump sugjeroi sot se Shtetet e Bashkuara mund të vendosin tarifa ndaj vendeve që kundërshtojnë përpjekjet e tij për të marrë kontrollin e Groenlandës, duke e justifikuar këtë si një çështje të sigurisë kombëtare.
Duke folur në Shtëpinë e Bardhë, Trump tha se “tarifat mund të përdoren si mjet presioni ndaj vendeve që rezistojnë planeve të tij”, pa dhënë detaje se cilat shtete mund të preken apo kur do të ndërmerren këto masa. Ky është një paralajmërim i ngjashëm me kërcënimet e mëparshme të presidentit ndaj vendeve evropiane në çështje tregtare dhe politike.
Deklaratat e përsëritura të Trump mbi Groenlandën kanë shkaktuar shqetësim brenda NATO-s. Aleatët evropianë, përfshirë Danimarkën, kanë theksuar se ishulli nuk është në shitje dhe çdo ndryshim statusi duhet të vendoset nga populli i tij. Në këtë kontekst, disa vende evropiane anëtare të Aleancës, përfshirë Gjermaninë, Francën dhe Mbretërinë e Bashkuar, kanë dërguar ekipe të vogla ushtarake në Groenlandë për të vlerësuar aftësinë e NATO-s për të mbrojtur rajonin arktik, në kuadër të një misioni zbulues të udhëhequr nga Danimarka.
Trump argumenton se kontrolli amerikan mbi Groenlandën është i domosdoshëm për të frenuar ndikimin rus dhe kinez në rajonin Arktik, i cili po fiton rëndësi strategjike për shkak të burimeve natyrore dhe rrugëve të reja detare.
Administrata amerikane, përmes zëdhënëses së Shtëpisë së Bardhë Karoline Leavitt, ka minimizuar dislokimin e trupave evropiane, duke theksuar se kjo nuk do të ndikojë në vendimmarrjen e presidentit apo objektivin e tij për të siguruar kontrollin mbi ishullin arktik.