Presidenti i SHBA-së, Donald Trump, ka ashpërsuar retorikën ndaj Iranit, duke deklaruar se Shtetet e Bashkuara janë të gatshme t’i përgjigjen me forcë çdo kërcënimi ndaj tij apo interesave amerikane.
Në një postim në platformën Truth Social, Trump pretendoi se ka urdhëruar një plan ushtarak që parashikon lëshimin e 1,000 raketave ndaj Iranit në rast se Teherani do të tentojë ta vrasë atë.
“1,000 raketa janë gati për t’u lëshuar drejt Republikës Islamike të Iranit, me mijëra të tjera që do të pasojnë menjëherë, nëse qeveria iraniane zbaton kërcënimin për të vrarë ose tentuar të vrasë Presidentin e Shteteve të Bashkuara”, shkroi Trump, duke shtuar se ushtria amerikane është e gatshme të ndërmarrë veprime të mëtejshme nëse do të jetë e nevojshme.
Ndërkohë, sipas një raporti të Axios, administrata amerikane i ka dërguar Iranit një ultimatum për të deklaruar deri gjatë së shtunës se Ngushtica e Hormuzit do të mbetet e hapur për lundrimin ndërkombëtar dhe se do të ndalojë sulmet ndaj anijeve tregtare.
Raporti, që citon tre zyrtarë amerikanë, thotë se mesazhi është përcjellë si drejtpërdrejt, ashtu edhe përmes ndërmjetësve rajonalë. Sipas tyre, Uashingtoni akuzon Teheranin se ka shkelur memorandumin e mirëkuptimit të arritur tre javë më parë, pas sulmeve të fundit ndaj anijeve tregtare në Ngushticën e Hormuzit.
Administrata amerikane argumenton se këto incidente kanë rritur tensionet dhe kanë vënë në pikëpyetje gatishmërinë e Iranit për të respektuar marrëveshje më të gjera, përfshirë negociatat mbi programin bërthamor.
Në qendër të përpjekjeve diplomatike është takimi i zhvilluar në Muscat mes ministrit të Jashtëm iranian, Abbas Araghchi, dhe homologut të tij nga Omani, Badr al-Busaidi. Omani vazhdon të luajë rolin e ndërmjetësit mes palëve, ndërsa po punon edhe për garantimin e sigurisë së lundrimit në rajon.
Sipas Axios, zyrtarët amerikanë presin që pas këtij takimi Irani të publikojë një deklaratë ku të angazhohet për ndalimin e sulmeve ndaj anijeve tregtare dhe për garantimin e lirisë së lundrimit në Ngushticën e Hormuzit.
Një zyrtar amerikan, i cituar nga media, paralajmëroi se refuzimi i këtyre kërkesave do të sillte pasoja të rënda për Teheranin, ndërsa shtoi se brenda udhëheqjes iraniane ekzistojnë ndarje lidhur me mënyrën se si duhet të vijojnë negociatat me administratën Trump.