Presidenti i Shteteve të Bashkuara, Donald Trump, po përgatit një paketë masash dukshëm më të rrepta kundër emigracionit të paligjshëm për vitin 2026, të mbështetura nga miliarda dollarë fonde të reja federale.
Plani parashikon zgjerimin e bastisjeve në vendet e punës, rritjen e deportimeve dhe forcimin e ndjeshëm të agjencive të sigurisë kufitare, pavarësisht reagimeve dhe kundërshtimeve në rritje në disa qytete amerikane.
Administrata Trump ka dislokuar agjentë të emigracionit në qytete të mëdha të SHBA-së, ku në disa raste janë raportuar përplasje me banorë gjatë kontrolleve në lagje me popullsi të lartë emigrante. Megjithatë, autoritetet kanë shmangur kryesisht bastisjet në ferma, fabrika dhe sektorë të tjerë ekonomikisht jetikë, të njohur për punësimin e emigrantëve pa dokumente.
Sipas paketës së re të shpenzimeve të miratuar nga Kongresi në korrik, Agjencia e Emigracionit dhe Doganave (ICE) dhe Patrulla Kufitare do të përfitojnë rreth 170 miliardë dollarë fonde shtesë deri në shtator 2029, një rritje e ndjeshme krahasuar me buxhetet aktuale vjetore prej rreth 19 miliardë dollarësh.
Zyrtarët e administratës bëjnë të ditur se fondet do të përdoren për punësimin e mijëra agjentëve të rinj, ndërtimin e qendrave të reja të paraburgimit dhe bashkëpunimin me kompani private për gjurmimin e emigrantëve pa status të rregullt ligjor.
Politikat e ashpra kanë ndikuar edhe në zhvillimet politike lokale. Në Miami, qytet me popullsi të madhe emigrante, u zgjodh javën e kaluar kryetari i parë demokrat i bashkisë pas gati 30 vitesh, një rezultat që, sipas tij, lidhet pjesërisht me reagimin ndaj politikave të administratës Trump.
Ndërkohë, presidenti ka hequr statusin e përkohshëm ligjor për qindra mijëra emigrantë nga Haiti, Venezuela dhe Afganistani, duke zgjeruar ndjeshëm numrin e personave që mund t’i nënshtrohen deportimit.
Trump ka premtuar largimin e rreth 1 milion emigrantëve në vit, një objektiv që, sipas ekspertëve, mbetet i vështirë për t’u realizuar. Deri më tani, që nga marrja e detyrës në janar, janë deportuar rreth 622 mijë emigrantë.