Presidenti amerikan Donald Trump paralajmëroi se po i soset durimi ndaj presidentit rus Vladimir Putin, duke theksuar se Uashingtoni është gati të reagojë me vendosmëri.
“Duhen dy veta për të kërcyer tango. Është e mahnitshme: kur Putini donte, Zelensky nuk pranoi. Kur Zelensky deshi, Putini nuk pranoi. Tani Zelensky është gati, ndërsa Putini është një pikëpyetje. Por ne do të duhet të reagojmë shumë, shumë fort”, deklaroi Trump.
Komentet e tij erdhën pas një nate me sulme të gjera me dronë në territorin rus. Shën Petersburg dhe Moska u shënjestruan, ndërsa raportohet për zjarre në një terminal portual në Primorsk dhe në uzinën e kompanisë Lukoil në Smolensk.
Për shkak të kërcënimeve me dronë, Aeroporti Pulkovo i Shën Petersburgut u mbyll përkohësisht, duke shkaktuar anulimin ose vonesën e afro 50 fluturimeve. Edhe kryeqyteti rus ishte mes objektivave të sulmeve.