Udhëheqësit e Francës, Mbretërisë së Bashkuar dhe Kanadasë nxorën sot një paralajmërim të fortë ndaj qeverisë izraelite të Benjamin Netanyahut, duke theksuar se nuk do të heshtin përballë “veprimeve skandaloze” në Rripin e Gazës.
Në një deklaratë të përbashkët, Emmanuel Macron, Keir Starmer dhe Mark Carney kërkuan ndalimin e menjëhershëm të operacionit ushtarak dhe heqjen e kufizimeve për ndihmën humanitare, duke denoncuar refuzimin e Izraelit për të lejuar ndihmën themelore si shkelje të drejtës ndërkombëtare.
Ata kërcënuan me sanksione të synuara ndaj Izraelit nëse vazhdon zgjerimin e paligjshëm të vendbanimeve në Bregun Perëndimor, që sipas tyre minojnë paqen dhe qëndrueshmërinë e rajonit.
Udhëheqësit riafirmuan mbështetjen për njohjen e shtetit palestinez dhe theksuan nevojën urgjente për armëpushim dhe lirimin e pengjeve nga Hamas, duke vënë në dukje se përshkallëzimi i konfliktit është “plotësisht joproporcional”.
“Zgjidhja me dy shtete mbetet e vetmja rrugë drejt paqes dhe stabilitetit afatgjatë për izraelitët dhe palestinezët,” përfunduan ata.