Policia franceze ka arrestuar tre shtetas shqiptarë pas kapjes së një kamioni që transportonte 130 kilogramë kokainë, në rajonin Landes, në jug-perëndim të Francës. Ngjarja ndodhi natën mes së premtes dhe të shtunës, më 31 janar, pranë qytetit Castets.
Kamioni, i ndaluar fillimisht nga doganierët, u sekuestrua dhe u vendos nën vëzhgim në qytetin Dax. Gjatë operacionit, tre shqiptarët iu afruan kamionit dhe u arrestuan nga forcat e rendit, duke u shoqëruar në paraburgim.
Hetimi për këtë ngjarje i është besuar policisë gjyqësore të Bayonne, nën autoritetin e Jurisdiksionit të Specializuar Ndërrajonal (JIRS) të Bordosë, duke u marrë me këtë çështje të rëndësishme ndërkombëtare.
Gjykata e Bordosë ka konfirmuar se “në këtë fazë është ende herët për të dhënë detaje të tjera”. Sipas burimeve, seancat e paraburgimit nuk konfirmuan që tre shqiptarët kishin ardhur për të marrë ngarkesën, por u vendosën masa kufizuese: njëri prej tyre mori urdhrin për t’u larguar nga territori francez, ndërsa të tjerët morën ndalim për të hyrë në qytetin Dax.
Ky operacion vjen pas një rritjeje të kontrollit të autoriteteve franceze mbi trafikun ndërkombëtar të drogës, veçanërisht në zonat kufitare dhe rrugët kryesore të transportit.