Familja Oruqi në Shkodër prej 4 ditësh ndodhet në ankth dhe në panik. Edisoni, baba i 3 fëmijëve dhe banues në lagjen “Kiras”, është zhdukur pa gjurmë.
Sipas familjarëve të tij që kanë ngritur apelin me dhimbje ne zemër edhe në media, Edisoni ka qenë duke punuar në lumin e Shalës kur ka humbur kontaktet me familjen.
Zhdukja e tij mbetet e mistershme, pasi bashkëpunëtori i tij dhe familja thonë se Edisonin e kanë parë për herë të fundit duke punuar në një bujtinë.
Skënder Pepkolaj, një nga bashkëpunëtorët, thotë se Edisonin e ka marrë vëllai i pronarit për të ngarkuar materiale ndërtimi dhe i ka thënë se do ta rikthente nesër.
Pas përfundimit të punës, ai ka komunikuar se punëtori është lënë në një ishull të vogël me rërë.
Ka qenë vetë Pepkolaj që ka bërë denoncimin në polici për zhdukjen e Edisonit, i cili ishte ndihmësi i tij në punën ndërtimore. Policia e Shkodrës ka zhvilluar disa kontrolle në lumin e Shalës, por deri tani nuk ka arritur të gjejë asnjë rezultat.