Nga bunkerët e errët të së shkuarës komuniste te ritmi i gjallë i kafeneve moderne, Tirana po fiton vëmendjen e mediave ndërkombëtare si një nga destinacionet më interesante në Europë. Në një artikull të botuar nga Travel Tomorrow, gazetari Martin Banks e përshkruan kryeqytetin shqiptar si një qytet që ndërthur historinë dramatike, kulturën e pasur dhe energjinë moderne.
Artikulli ndalet te transformimi i Tiranës, nga një qytet i shënjuar nga diktatura e Enver Hoxhës, bunkerët dhe represioni, në një metropol plot ngjyra dhe jetë. Mes pikave më mbresëlënëse për turistët renditen Bunk’Art dhe “Shtëpia me Gjethe”, dy muze që ruajnë kujtesën e periudhës komuniste dhe ofrojnë një përballje të drejtpërdrejtë me të kaluarën e vendit.
Vëmendje të veçantë merr edhe Sheshi Skënderbej, zemra e kryeqytetit, ku ndërthuren historia dhe arkitektura, si dhe kultura e kafesë, që sipas artikullit është kthyer në një ritual të përditshëm për shqiptarët. Tirana përmendet si një nga qytetet me numrin më të lartë të kafeneve për frymë në botë, ndërsa vende si Komiteti – Muzeu i Kafes konsiderohen atraksione më vete.
Një pjesë interesante i kushtohet edhe lidhjes së veçantë të shqiptarëve me ish-presidentin amerikan George W. Bush, i cili vazhdon të gëzojë popullaritet të madh në vend, si simbol i mbështetjes amerikane për Shqipërinë dhe Kosovën.
Artikulli ndalet gjithashtu te harmonia fetare në Shqipëri, duke përmendur Katedralen Katolike, Xhaminë e Et’hem Beut, si dhe transformimin e Piramidës së Tiranës në një hapësirë moderne arti dhe aktivitetesh.
Në fund, Travel Tomorrow thekson se Tirana nuk është vetëm një qytet me histori unike, por edhe një kryeqytet që sheh drejt së ardhmes, me aspiratën për t’u bërë pjesë e Bashkimit Europian deri në vitin 2030 dhe me mbështetje të fortë popullore për këtë rrugëtim.