Materniteti “Mbretëresha Geraldinë” ka përfunduar procesin e transformimit të plotë, falë një investimi që modernizon infrastrukturën dhe përmirëson ndjeshëm kushtet për pacientët dhe personelin shëndetësor.
I pajisur me ambiente bashkëkohore dhe teknologji të avancuar, institucioni, i cili u shërben mbi 20 mijë pacienteve në vit, synon të ofrojë shërbime sipas standardeve më të mira evropiane, duke garantuar kujdes të specializuar për gratë dhe të porsalindurit.
Në ceremoninë e inaugurimit morën pjesë kryeministri Edi Rama dhe ministrja e Shëndetësisë dhe Mirëqenies Sociale, Evis Sala.
Në fjalën e tij, Rama e cilësoi investimin si një tjetër hap të rëndësishëm në modernizimin e sistemit shëndetësor, duke theksuar se gjatë rikonstruksionit është ruajtur edhe vlera historike e godinës, ndërsa janë shtuar hapësira të reja për të rritur cilësinë e shërbimit.
Kryeministri vlerësoi punën e mjekëve, infermierëve dhe të gjithë punonjësve të shëndetësisë, duke theksuar se ata përballojnë çdo ditë një ngarkesë të madhe pune dhe meritojnë mbështetje të vazhdueshme.
Sipas Ramës, sistemi shëndetësor ka pësuar një transformim të ndjeshëm gjatë viteve të fundit, me përmirësime në infrastrukturë, kushtet higjieno-sanitare dhe pajisjet mjekësore, çka ka ndikuar edhe në uljen e infeksioneve pas ndërhyrjeve kirurgjikale.
Ai bëri të ditur se në Shqipëri realizohen rreth 100 mijë ndërhyrje kirurgjikale në vit, duke e cilësuar këtë si tregues të rritjes së kapaciteteve të sistemit dhe përkushtimit të personelit mjekësor.
Në përfundim, Rama u zotua se qeveria do të vijojë politikën e rritjes së pagave për mjekët dhe infermierët, si dhe do të vazhdojë të investojë për përmirësimin e kushteve të punës dhe mirëqenies së tyre, duke i konsideruar ata një nga shtyllat kryesore të sistemit shëndetësor në vend.