Trajneri i Juventusit, Igor Tudor, ka shprehur hapur pakënaqësinë e tij në prag të fillimit të sezonit të ri të Serie A. Tekniku kroat, i cili ka marrë drejtimin e skuadrës bardhezi këtë verë, ka kritikuar mënyrën se si është organizuar merkatoja në Itali dhe në Evropë.
“Është e pabesueshme që kampionati të nisë ndërsa merkato është ende e hapur. Trajnerët çmenden në këto kushte, sepse nuk ka siguri dhe nuk ke qartësi për skuadrën me të cilën do të punosh gjatë gjithë vitit,” tha Tudor për Sky Sport.
Sipas tij, zgjidhja do të ishte e thjeshtë: “Do të ishte normale që merkato të mbyllej të paktën një javë para nisjes së kampionatit. Kështu do të kishte më shumë stabilitet për të gjithë, si për klubet, ashtu edhe për trajnerët”. Por realiteti është ndryshe. Serie A nis ndërkohë që merkato mbetet e hapur edhe për dy javë të tjera. Kjo gjë, sipas Tudor, krijon pasiguri jo vetëm te stafet teknike, por edhe te vetë lojtarët që mund të largohen ose të vijnë deri në ditën e fundit të afatit kalimtar.
“Në fund, çfarë do të ndodhë në merkato, do të shohim. Çdo trajner do të dëshironte të kishte lojtarët më të mirë të mundshëm në dispozicion. Ndonjëherë ia del, ndonjëherë jo. Ajo që duhet të bëjmë është të pranojmë situatën dhe të përqendrohemi te fusha dhe te lojtarët që kemi aktualisht,” u shpreh ai.
Me këtë mesazh të qartë, Tudor kërkon të mbajë vëmendjen te sezoni i ri, duke shmangur shpërqendrimet që sjell merkatoja e hapur. Objektivi i tij është të krijojë një skuadër të fortë dhe të bashkuar, pavarësisht pasigurive të momentit. Një deklaratë deri diku e kuptueshme, duke ditur se Juventus kur jemi vetëm një ditë larg startit të sezonit, aty ku bardhezinjë do të sfidojnë të dielën në mbrëmje Parmën në Torino, ende skuadra nuk është e kompletuar mjaftueshëm, me “Zonjën e Vjetër” që pret të sigurojë shërbimet e një sulmuesi krahu, aty ku për momentin në “pole-position” është Edon Zhegrova, si dhe kërkon rikthimin në Torino edhe për këtë sezon të Kolo Muanit nga PSG./PanoramaSport