Detaje të reja nga hetimet kanë zbuluar se shpërthimi vdekjeprurës në fabrikën e industrisë ushqimore “Violanta”, në Greqi, u shkaktua nga një rrjedhje disamujore e propanit, e cila nuk u evidentua në kohë. Ngjarja e rëndë ndodhi në orët e para të mëngjesit të së hënës, duke i marrë jetën pesë punonjësve.
Sipas komandantit të ESKEDIK pranë Shërbimit Zjarrfikës, gjeneral brigade Anastasios Michalopoulos, në kuadër të hetimit teknik u konstatuan dy depozita propani mbi tokë, me kapacitet 5.000 dhe 9.000 litra, të vendosura rreth 30 metra larg zonës së shpërthimit. Njëra prej tyre, ajo 5.000-litërshe, paraqiste shenja përdorimi të fundit, ndërsa lidhja mes depozitave realizohej përmes tubacioneve nëntokësore që kalonin nën një zonë të asfaltuar dhe furnizonin furrat e prodhimit në katin përdhes të fabrikës.
Pas kontrolleve të specializuara me azot, autoritetet zbuluan një rrjedhje të konsiderueshme propani në tokë, në një thellësi rreth 60 centimetra. Pajisjet matëse regjistruan përqendrime jashtëzakonisht të larta të gazit, ndërsa vlerësohet se rrjedhja kishte vazhduar për muaj me radhë.
Sasia e madhe e propanit u përhap përmes tokës në një distancë rreth 25 metrash dhe u grumbullua në një hapësirë nëntokësore. Në prani të një shkëndije, që dyshohet të jetë shkaktuar nga pajisje elektromekanike të objektit, ndodhi shpërthimi shkatërrimtar.
Shërbimi Zjarrfikës u njoftua për zjarrin në orën 03:56 të mëngjesit të 26 janarit 2026, ndërsa mjeti i parë mbërriti në vendngjarje në orën 04:11. Në operacion morën pjesë 13 mjete zjarrfikëse, një mjet me krah të lëvizshëm, 9 mjete ndihmëse, dy ekipe të EMAK-ut nga Larisa dhe Lamia, si dhe një ekip me dron. Në total u angazhuan 53 zjarrfikës, ndërsa u aktivizuan edhe forcat e Policisë Greke dhe ambulanca të shërbimit emergjent EKAV.
Në momentin e shpërthimit, fabrika funksiononte 24 orë në ditë dhe brenda saj ndodheshin 13 punonjës. Tetë persona arritën të dalin, prej të cilëve disa u transportuan në spital për ndihmë mjekësore.
Operacionet e kërkim-shpëtimit vijuan paralelisht me shuarjen e zjarrit. Dy trupa të karbonizuar u gjetën rreth orës 07:55, trupi i tretë pak minuta më pas, i katërti rreth mesditës, ndërsa më 27 janar 2026 u gjet edhe viktima e pestë.
Menjëherë pas ngjarjes u aktivizua Drejtoria për Hetimin e Krimeve të Zjarrit, e cila kreu ekspertiza të detajuara në terren, analizë laboratorike të provave, marrje dëshmish dhe vlerësim teknik të instalimeve.
Në vijim të hetimeve, më 27 janar 2026 u arrestuan tre shtetas grekë, të dyshuar për vrasje nga pakujdesia, plagosje të rëndë trupore në seri, zjarrvënie dhe shpërthim. Ata u paraqitën para Prokurores së Trikalas, ndërsa procedurat hetimore dhe penale vijojnë.