Futbollisti francez, Aleksis Vergos, 22 vjeç, ka ndërruar jetë pas një aksidenti tragjik në Tajlandë. Sipas policisë së Koh Samui, ai rrëshqiti nga shkëmbinj të lagur ndërsa bënte selfie me të dashurën e tij në një nga ujëvarat më të njohura të jugut të vendit. Autopsia konfirmoi se shkaku i vdekjes ishte trauma në kokë.
Klubi i tij, Quimper Ergué Armel FC, përmes një njoftimi në rrjetet sociale shprehu ngushëllimet e tij:
“Me hidhërim të madh njoftojmë vdekjen e Aleksis Vergos, lojtarit tonë të talentuar dhe vullnetarit të klubit. Ai filloi të luante futboll me ne që në moshën 6 vjeç dhe luajti në ekipin e të rriturve deri dy sezone më parë. Klubi bashkohet me familjen dhe miqtë e tij në zi.”
Vendi ku ndodhi aksidenti ka qenë më parë skenë e ngjarjeve të ngjashme, duke treguar rrezikun e këtyre atraksioneve turistike për selfie ekstrem.