Një tragjedi e rëndë ka tronditur komunitetin shqiptar në Itali, ku katër anëtarë të familjes Kola humbën jetën si pasojë e rrjedhjes së monoksidit të karbonit nga kaldaja në banesën e tyre.
Arti dhe Jonida Kola, së bashku me dy fëmijët e tyre, Hajdarin 22 vjeç dhe Xhesikën vetëm 15 vjeçe, u gjetën të pajetë në shtëpinë e tyre në zonën Pianna di Luca. Ngjarja ka shkaktuar dhimbje të thellë mes familjarëve, miqve dhe komunitetit shqiptar në zonë.
Në emisionin Top Story, Ernest Çela, miku i ngushtë i Hajdar Kolës, ka rrëfyer momentet dramatike kur mbërriti në banesë bashkë me xhaxhain e të riut.
“Nuk kishim asnjë dijeni për ndonjë defekt në kaldajë. Kur erdhi policia, shkuam në shtëpi, në katin e dytë. Xhaxhai i tij shpërtheu derën dhe aty i pamë të katërt përtokë. Në momentin që hymë, Darioni dhe babai i tij kishin ende puls. U përpoqëm t’i zgjonim, por situata u përkeqësua dhe filluam të ndiheshim keq edhe ne. Qëndruam rreth 10 minuta brenda, por nuk mund të bënim asgjë”, rrëfen Çela.
Ai shton se gjendja shëndetësore e xhaxhait të familjes është tashmë jashtë rrezikut për jetën.
Duke folur për Hajdarin, miku i tij thekson se ishte një djalë punëtor dhe i qetë, i cili punonte si elektricist. Familja kishte vetëm gjashtë muaj që ishte shpërngulur në shtëpinë e re.
“Shtëpia ishte objektivi i tyre. Çdo fundjavë e rregullonin, ishin krenarë për hapin që kishin bërë. Pas kësaj tragjedie, i gjithë komuniteti shqiptar është mbledhur këtu. Jemi të gjithë të shokuar”, përfundon ai.