Kreu i qeverisë, Edi Rama, akuzon gjykatësin Klarent Demiri për dy vendime që pengojnë ekzekutimin e çlirimit të një toke të xanun, duke vepruar sipas tij në kundërshtim të hapur me interesin publik dhe programet e qeverisë për zhvillimin e qyteteve dhe Shqipërisë drejt BE-së.
Rama thekson se nuk do të tolerohet keqpërdorimi i pushtetit të pavarur gjyqësor për të penguar projekte, vendime dhe programe në interes të publikut.
Ai njofton se ndaj gjykatësit Demiri, po ashtu si ndaj prokurores Gjeli dhe gjykatës Balliu, do t’i drejtohen organet e pavarura të qeverisjes dhe kontrollit të gjyqësorit, duke kërkuar profesionalizëm dhe kurajo, ashtu si parashikon Reforma në Drejtësi.
Postimi kryeministrit Edi Rama:
Çfarë duhet të ketë ngrënë gjykatësi Klarent Demiri kur ka marrë vendimin për të penguar ekzekutimin e vendimit të çlirimit të kësaj “toke të xanun”?
Dhe nuk ka marrë një, po dy vendime të tilla, duke u shquar si i vetmi gjykatës deri tani që i ka rënë ndesh haptaz interesit publik, interesit të komuniteteve për çlirimin e hapësirave të tyre publike dhe zbatimit të programit të qeverisë në dobi të qyteteve e në funksion të Shqipërisë 2030 në BE️
Një gjë është pak po e sigurtë:
Ne nuk do ta tolerojmë më as në heshtje, as duarlidhur asnjë përfaqësues të pushtetit të pavarur gjyqësor, që pavarësinë e tij do ta keqpërdorë për të cënuar pavarësinë e pushtetit ekzekutiv, duke penguar përmes shpërdorimit arbitrar të detyrës së vet zbatimin e programeve, projekteve apo vendimeve në interes të publikut❌
Edhe për gjykatës Demirin do t’i drejtohemi organeve të pavarura të qeverisjes e të kontrollit të gjyqësorit, njësoj si për prokurore Gjelin dhe për gjykatës Balliun, duke vazhduar të shpresojmë se këto organe jetike për mirëqeverisjen e gjyqësorit do të dalin nga zona e komfortit ku janë rehatuar, ndërkohë që Reforma në Drejtësi kërkon në radhë të parë përkushtimin, profesionalizmin e kurajon e tyre