Këshilli Bashkiak i Tiranës ka miratuar 1,500 kuota të reja për programin e subvencionimit të interesave të kredisë, me qëllim mbështetjen e familjeve që nuk kanë një banesë në pronësi dhe nuk përballojnë normat e interesit të tregut.
Gjatë mbledhjes, kryetarja e deleguar e Bashkia Tiranë, Anuela Ristani, bëri të ditur se për vitin 2025 janë shpallur fitues 1,231 individë apo familje me fondet e buxhetit të shtetit, ndërsa për periudhën 2026–2028 bashkia do të mbulojë 1,500 kuota të reja me fondet e saj, për shkak të rritjes së kërkesave.
Sipas saj, përfitues do të jenë familjet dhe individët që:
Nuk kanë banesë në pronësi ose zotërojnë sipërfaqe nën normat e strehimit;
Nuk kanë kryer tjetërsim prone në 5 vitet e fundit (përveç rasteve force madhore);
Nuk përballojnë normën e interesit të tregut për blerjen e një banese.
Ristani theksoi se projektvendimi synon të rrisë aksesin në pronësi për familjet e reja, të ulë barrën financiare të interesit bankar dhe të forcojë rolin e bashkisë në politikat sociale.
Faza e aplikimit
Faza I
Aplikimi elektronik përmes portalit “e-Albania”
Afati: 30 ditë
Shpallja publike e listave
Faza II
Dorëzimi i dokumentacionit (fizikisht ose me postë)
Verifikim administrativ: 30 ditë
Shqyrtim nga Komisioni i Strehimit: 45 ditë
Në çdo fazë parashikohet e drejta e ankimimit, për të garantuar një proces të rregullt administrativ.