Kompania Danone ka njoftuar tërheqjen nga tregu të një produkti qumështi pluhur të markës Aptamil, si masë paraprake sigurie, për shkak të dyshimeve se një seri prodhimi mund të përmbajë mikroorganizma ose baktere.
Produkti në fjalë tregtohet edhe në Shqipëri, ndaj subjektet tregtare janë udhëzuar të ndërpresin menjëherë shitjen e tij.
Një nga kompanitë që ka reaguar është Rossmann Lala, e cila ka bërë të ditur publikisht se ka tërhequr të gjitha sasitë e produktit nga rrjeti i saj i dyqaneve. Kompania sqaron se konsumatorët që e kanë blerë këtë produkt do të rimbursohen plotësisht.
Danone ka publikuar edhe dy seritë e prodhimit për të cilat kërkohet tërheqja nga tregu, duke theksuar se deri më tani nuk ka raportime zyrtare për praninë e mikroorganizmave. Megjithatë, masa është ndërmarrë si veprim paraprak, në pritje të analizave përfundimtare.
Qumështi Aptamil shitet në dyqane, markete dhe farmaci, ndaj konsumatorët këshillohen të tregojnë kujdes dhe të verifikojnë kodet e serisë së produktit që kanë blerë.
Nuk dihet ende nëse të gjitha subjektet e tjera tregtare do të ndjekin të njëjtën politikë rimbursimi si Rossmann Lala. Deri në daljen e rezultateve përfundimtare të analizave, konsumatorët ftohen të mos e konsumojnë produktin.