Një 59-vjeçar, banues në Maqedoni, është arrestuar në Portin e Durrësit, pasi tentoi të nxirrte nga territori shqiptar dhjetëra steka me cigare elektronike, të fshehura në automjetin që drejtonte.
Sipas Policisë Kufitare, arrestimi u krye nga shërbimet e PKK Port, Durrës, në kuadër të kontrolleve të shtuara për parandalimin dhe goditjen e paligjshmërive në kufi. Gjatë kontrollit të imtësishëm në dalje të Republikës së Shqipërisë, në kamionin që drejtonte shtetasi A. S., 59 vjeç, u konstatuan të fshehura 37 steka me paketa cigaresh elektronike.
Në cilësinë e provës materiale u sekuestruan stekat me cigare elektronike, një aparat celular si dhe kamioni me të cilin po transportoheshin mallrat e kontrabanduara.
Materialet procedurale i janë referuar Prokurorisë së Durrësit për veprime të mëtejshme ligjore.