Tenderi i fiskalizimit i hapur në prill të vitit të shkuar, ka përfunduar sërish i ankimuar në Komisionin e Prokurimit Publik. Një prej operatorëve ka shprehur rezerva në fazën e vlerësimit të kësaj procedure e cila ka një fond limit mbi 7.7 milionë euro.
Ecuria e deritanishme e kësaj procedure ka qenë komplekse duke thyer rekord për afatin në të cilën është shtrirë procedura që rezulton plot një vit por edhe numrin e shpeshtë të ankimimeve në KPP.
Për herë të fundit ky komision i hoqi pezullimin procedurës që ka për autoritetit kontraktor Agjencinë Kombëtare të Shoqërisë së Informacionit në muajin shkurt duke i hapur rrugë vijimit të procedurave të cilat shënuan mbylljen në 5 mars 2026. Tenderi me objekt kontrate “Mirëmbajtje e Modulit të Menaxhimit të Kontrollit të Faturimit për Drejtorinë e Përgjithshme të Tatimeve” tashmë ka kaluar në fazën e vlerësimit dhe duket se pikërisht këtu qëndrojnë edhe rezervat sipas ankesës së publikuar këtë të mërkurë.
Ky nuk është tenderi i parë që lidhet me sistemet e IT dhe shërbime të lidhura me to që zvarriten mes ankimimeve. Më herët i njëjti problem u shfaq për sistemin e Thesarit dhe AFMIS ndërkohë vonesa pati edhe shërbimi i internetit në institucionet publike. Këto vonesa shfaqën efekt zinxhir në disa raste dhe në shërbime që lidheshin me punën e institucioneve.
Tenderi për sistemin e fiskalizimit
Tenderi me objekt kontrate Mirëmbajtje e Modulit te Menaxhimit te Kontrollit te Faturimit për Drejtorinë e Përgjithshme te Tatimeve u hap në prill të vitit të shkuar. Sipas dokumenteve që shoqërojnë procedurën, qëllimi kryesor i këtij projekti është mirëmbajtja e sistemit të Menaxhimit të Kontrollit të Faturimit (sistemi i fiskalizimit) për Drejtorinë e Përgjithshme të Tatimeve për një periudhë prej 24 muajsh.
“Qëllimi është garantimi i funksionimit të plotë të sistemit elektronik, në të gjithë komponentët e tij: softuer dhe pajisje fizike (hardëare). Ky sistem është i hostuar në Qendrën e të Dhënave Qeveritare, pranë Agjencisë Kombëtare të Shoqërisë së Informacionit (AKSHI), dhe ofron shërbime për rreth 125 mijë tatimpagues, si dhe për vetë administratën tatimore”, thuhet në dokumente.
Në dokumentacion theksohet se disponueshmëria e sistemit të fiskalizimit është shumë e rëndësishme. Shërbimi i fiskalizimit dhe portali i tatimpaguesve (SelfCare) nuk mund të pësojnë ndërprerje për më shumë se disa minuta dhe nuk tolerohen ndërprerje të planifikuara për qëllime përditësimi (upgrade, update) apo modifikime të tjera.
“Shërbimet e ofruara për tatimpaguesit (fiskalizimi, verifikimi i faturave, pranimi/refuzimi i tyre, etj.), si dhe për administratën tatimore, duhet të jenë funksionale 24 orë në ditë, 7 ditë në javë,” theksohet më tej.
Aktualisht, ky sistem përdoret nga bizneset dhe qytetarët, ndërsa në përdorim të brendshëm është i aksesueshëm nga administrata tatimore dhe institucione të tjera publike të autorizuara. Dokumentet e tenderit përshkruajnë kërkesat dhe përgjegjësitë për mirëmbajtjen e sistemit të fiskalizimi./ Monitor