TIRANË– Gjatë protestës së sotme para Bashkisë Tiranë, Dorian Teliti, nënkryetari demokrat i Këshillit Bashkiak të Tiranës, është shprehur se opozita nuk do të tërhiqet derisa çdo zyrtar i Bashkisë së Tiranës që ka abuzuar me detyrën dhe ka shpërdorur apo vjedhur fondet të përballet me drejtësinë.
Sipas Telitit nëse 130 milionë euro nuk do të ishin vjedhur te Inceneratori i Tiranës sot do të kishim një qytet ndryshe.
“Do ishte një qytet ndryshe, një qytet me shkolla, dhe janë me dhjetra shkolla të Tiranës, edhe në vitin e ri akademik, do të kemi mësimin me dy turne. Drejtësi do të bëhet, ne gjyqin popullor do e bëjmë një për një, ashtu sikundër kemi bërë këto 22 javë. Ata do të përballen me drejtësinë dhe ne nuk do t’i falim asnjë qindarkë.”-tha Teliti.
Më tej ai ka thënë: A ka sot Tirana një transport më të mirë urban? Jo përkundrazi. A kemi sot një ajër më të pastër? Jo, përkundrazi, ndotja është 18 herë më të lartë se normat. A kemi një qytet me ujë të pijshëm? Jo përkundrazi. A është ky qytet i jetueshëm? Jo përkundrazi. Ky qytet dhe kjo Shqipëri sot fatkeqësisht nuk ka as drejtësi, pasi ata që kanë vjedhur, janë në zyrat e tyre, madje ruhen edhe nga kjo policia, sikundër ndodh këtu. Ndërkohë lideri i opozitës mbahet në arrest politik, pa asnjë fakt e provë. Rezistenca jonë, rezistenca popullore, pavarësisht se është e lodhshme, do të bëjë të mundur që këta abuzues, këta hajdutë, të përballen me drejtësinë.