Prokuroria Themelore në Prishtinë ka dhënë detaje lidhur me incidentin e armatosur që ndodhi të enjten në sheshin “Bulevardi i Dëshmorëve” në Podujevë, ku katër persona mbetën të plagosur, mes tyre edhe një kalimtar i rastit.
Sipas Prokurorisë, ngjarja ka ndodhur rreth orës 13:40, kur tre persona u përfshinë në një përleshje me armë zjarri. Hetimet fillestare tregojnë se në rast janë të përfshirë persona me lidhje familjare, konkretisht nip dhe dajë, ndërsa motivi i dyshuar lidhet me një mosmarrëveshje të mëhershme.
“Menjëherë pas pranimit të informatës nga Policia e Kosovës, prokurori kujdestar i Departamentit për Krime të Rënda ka dalë në vendin e ngjarjes dhe, në bashkëpunim me njësitë përkatëse të Policisë së Kosovës, janë ndërmarrë të gjitha veprimet e nevojshme hetimore për ndriçimin e plotë të rrethanave të rastit. Personat e përfshirë dyshohen për kryerjen e veprës penale ‘Vrasje e rëndë në tentativë’, sipas nenit 173, lidhur me nenin 28 të Kodit Penal të Republikës së Kosovës”, thuhet në njoftimin e Prokurorisë.
Katër të plagosurit janë transportuar në Qendrën Klinike Universitare të Kosovës (QKUK), ku po marrin trajtimin e nevojshëm mjekësor.
Prokuroria Themelore në Prishtinë bëri të ditur se, në koordinim të ngushtë me Policinë e Kosovës, po vazhdon hetimet dhe ndërmarrjen e të gjitha veprimeve të nevojshme për zbardhjen e plotë të rrethanave të kësaj ngjarjeje.