Në çdo njoftim që bën RAPEX lodrat e fëmijëve janë prezent ama publikimi i kësaj javë është fokusuar në lodrat nga më të ndryshmet e deri te kukullat, të cilat përbëjnë rrezik kimik, por edhe rrezikojnë mbytjen e fëmijëve.
Një nga produktet e evidentuara është Këna në formë pluhuri, e ambalazhuar në qese plastike, transparente dhe me etiketë.
Lloji i rrezikut sipas RAPEX është mikrobiologjik, pasi produkti është i kontaminuar me mikroorganizma mezofilë aerobikë dhe i mungojnë udhëzimet për përdorim dhe paralajmërimet.
Kjo mund të shkaktojë infeksione të veshit, lëkurës dhe syve.
Gjithashtu nga hetimet paraprake është zbuluar se produkti nuk përputhet me Rregulloren e Produkteve Kozmetike dhe as me Rregulloren për klasifikimin, etiketimin dhe paketimin e substancave dhe përzierjeve (CLP).
Një tjetër produkt janë topat plastik me diametër 15 cm. Sipas njoftimit të BE, rreziku është kimik, pasi materiali plastik i këtyre topave ka një përqendrim të tepruar të dibutil ftalatit (DBP) dhe diizobutil ftalatit (DIBP).
Këto ftalate mund të dëmtojnë shëndetin e fëmijëve duke shkaktuar dëme të mundshme në sistemin e tyre riprodhues.
Ndërkohë nuk mungojnë as lodrat e fëmijëve, të cilat mund të gëlltiten prej tyre dhe shkaktojnë mbytje. Duke imituar ftura-perime apo enë guzhine, për shkak të pamjes, formës, ngjyrës dhe madhësisë së tyre karakteristike, produkti mund të ngatërrohet si ushqim.
Këto produkte përmbajnë pjesë të vogla e një fëmijë i vogël mund t’i futë në gojë dhe të mbytet.
Më të dashurat e vajzave të vogla, kukullat vazhdojnë të jenë prezente si rrezik për fëmijët.
Materiali plastik i tyre përmban një sasi të tepërt bis(2-etileksil) ftalati (DEHP), dibutil ftalat (DBP) dhe diizobutil ftalat (DIBP) (vlerat e matura deri në 11,1 %, përkatësisht 0,88% dhe 26,6 % ndaj peshës. Këto ftalate mund të dëmtojnë shëndetin e fëmijëve duke shkaktuar dëme të mundshme në sistemin e tyre riprodhues.
Njoftimi I RAPEX ka të përfshira dhjetra produkte, ku nuk mungojnë kozmetika e produktet e higjienës, edhe të markave më të njohura si Palmolive, Borotalco etj, deri te parfumet, mjete të ndryshme pune e deri te autoveturat dhe autobusët që rezultojnë me probleme fabrike .