Tirana po mbështet mbi supe gjysmën e rritjes ekonomike të Shqipërisë, ndërsa pjesa tjetër e vendit ecën më ngadalë. Sipas të dhënave të INSTAT, ekonomia shqiptare u rrit me 4.02% në 2023, ndërsa kryeqyteti kontribuoi me mbi 2% të kësaj rritjeje.
Pas Tiranës, qarqet më të forta ekonomikisht janë Fier dhe Durrës, si nyje kryesore për industrinë dhe transportin, ndërsa Elbasani dhe Vlora shfaqin aktivitet të konsiderueshëm ekonomik në zonat qendrore dhe bregdetare. Shkodra dhe Korça mbajnë një peshë të moderuar, ndërsa Berati, Lezha, Dibra, Gjirokastra dhe Kukësi regjistrojnë kontributin më të ulët në PBB.
Analiza e PBB-së për frymë tregon hendek të thellë rajonal: Tirana kryeson me 1.36 milionë lekë për frymë, ndjekur nga Durrësi dhe Fieri me mbi 1 milion lekë për frymë, ndërsa Kukësi, Dibra dhe Berati mbeten në fund të listës.
Ky zhvillim i pabalancuar rajonal nënkupton se mundësitë ekonomike, investimet dhe punësimi janë përqendruar kryesisht në pak zona, duke lënë pas rajone të tjera. Pasojat janë rritja e hendekut social dhe ekonomik dhe migrimi drejt qendrave urbane, duke krijuar sfida për zhvillimin e qëndrueshëm gjithëvendor.