Qeveria ka rikthyer idenë e ngritjes së një rezerve shtetërore të sigurisë për naftën, që do të përdoret në raste krizash apo mungesash furnizimi. Projektligji i ri, i publikuar për konsultim, parashikon krijimin e një rezerve që mbulon 90 ditë konsum, por kostoja për buxhetin dhe qytetarët është shumë e lartë.
Sipas dokumentit zyrtar, rezervat do të krijohen gradualisht në bazë të një plani veprimi të miratuar nga Këshilli i Ministrave.
Për të garantuar furnizimin 90-ditor, nevojiten 270–300 mijë ton karburantë, me një vlerë tregu prej rreth 260–300 milionë eurosh.
Ruajtja në depo kushton rreth 10 euro/ton në muaj, çka për një sasi 300 mijë tonësh arrin në 36 milionë euro në vit.
Ndërtimi i depozitave nga shteti do të kushtonte afërsisht 260 milionë euro, duke e çuar faturën totale në 520 milionë euro, pa përfshirë kostot e mirëmbajtjes dhe personelit.
Për të përballuar këtë faturë të kripur, projektligji parashikon që përveç kredive dhe fondeve nga buxheti i shtetit, të vendoset një tarifë e re mbi produktet hidrokarbure, që do të shtohet mbi taksat ekzistuese të karburantit (akciza, taksa e qarkullimit, e karbonit, skanimit, etj.).
Tarifa e saktë do të përcaktohet me vendim të Këshillit të Ministrave pas miratimit të ligjit.
Kjo do të thotë se çdo qytetar do të paguajë edhe më shumë për karburantin, për të financuar rezervën e re të sigurisë.