“Vrasja e pesë gazetarëve, katër punonjësve të shëndetësisë dhe disa civilëve dje në Gaza është krejtësisht e papranueshme.” Kështu deklaroi zëdhënësi i Komisionit të BE-së, Anouar El Anouni, gjatë një konference për shtyp, duke dënuar sulmin izraelit në spitalin Nasser në Khan Youris.
“Ne përsërisim thirrjen tonë ndaj Izraelit që të respektojë të drejtën ndërkombëtare humanitare dhe të sigurojë që këto sulme të hetohen, dhe vërejmë deklaratat e autoriteteve izraelite se do të kryhet një hetim i plotë.”, shtoi El Anouni për mediat, duke kërkuar që ndihmat të mos politizohen.
“Vuajtjet humanitare në Gaza kanë arritur nivele të paimagjinueshme. Është e tmerrshme ajo që po ndodh para syve tanë, me urinë. Ndihma nuk duhet të politizohet kurrë”, shtoi ai.
Nga dy sulmet e djeshme që synonin katin e katërt të spitalit, u vranë 20 persona, pesë prej të cilëve gazetarë, staf mjekësor dhe civilë të tjerë. Shumë të tjerë u plagosën.
Ndërkohë, kryeministri izraelit Benjamin Netanyahu do të mbledhë Kabinetin e Sigurisë sot për të diskutuar për Gazën dhe përpjekjet për të arritur një zgjidhje për pengjet, tha zyra e tij për Times of Israel. Zyra nuk sqaroi nëse Netanyahu do ta ngrinte propozimin për armëpushim dhe lirim gradual të pengjeve që Hamasi tha se e kishte pranuar javën e kaluar, megjithëse mediat raportuan se kjo nuk ishte në axhendën e takimit.
Në ditët pas njoftimit të Hamasit, Netanyahu deklaroi se kishte udhëzuar ekipin negociator izraelit të rifillonte bisedimet për një marrëveshje gjithëpërfshirëse që do të garantonte lirimin e të gjithë pengjeve dhe do t’i jepte fund luftës sipas kushteve të Izraelit, duke riafirmuar njëkohësisht angazhimin e tij ndaj planit për të marrë kontrollin e Qytetit të Gazës. Raportet e mediave tregojnë se po zhvillohen diskutime në lidhje me vendin e raundit të ardhshëm të bisedimeve, por koha dhe përbërja e delegacionit izraelit nuk dihen ende.