Një ngjarje e rëndë ka tronditur sistemin e drejtësisë në Turqi, pasi një gjyqtare u qëllua me armë zjarri brenda një salle gjyqi në Stamboll, teksa ishte duke dhënë vendimin.
Sipas raportimeve, autori i sulmit është ish-bashkëshorti i saj, një oficer gjyqësor që punonte në të njëjtën gjykatë. Ai e qëlloi gjyqtaren përpara se të neutralizohej nga një i burgosur që ndodhej në ambientet e gjykatës dhe shërbente çaj për stafin, si pjesë e një programi për ulje dënimi.
Pas sulmit, gjyqtarja mori ndihmën e parë në vendngjarje dhe u transportua me urgjencë në spital. Ngjarja ndodhi në një gjykatë në anën aziatike të Stambollit.
Reagime të forta kanë ardhur nga organizatat për të drejtat e grave. Organizata “We Will Stop Feminicides” deklaroi se edhe gjykatat, të cilat duhet të jenë vendi i drejtësisë dhe mbrojtjes, nuk janë më të sigurta për gratë.
“Gratë po sulmohen edhe brenda gjykatave, pikërisht aty ku autorët duhet të ndëshkohen”, thuhet në reagimin e organizatës.
Sipas të dhënave të saj, gjatë vitit 2025 në Turqi janë vrarë 294 gra, ndërsa 297 të tjera kanë humbur jetën në rrethana të dyshimta.
Autoritetet turke kanë nisur hetimet për zbardhjen e plotë të rrethanave të sulmit.