Në një intervistë të thellë emocionale në “Grida Duma Podcast”, aktori i njohur Agron Llakaj ka treguar momentet më të vështira të jetës së tij pas ndarjes nga jeta të bashkëshortes, Kostandinës. Ai rrëfen se humbja e saj e la pa dëshirë për të jetuar për një periudhë të gjatë.
“Ajo la amanete, por unë nuk pranova që t’i jepte mua,” tha Llakaj, duke shpjeguar se ditët e para pas largimit të saj ishin të paimagjinueshme.
Ai zbuloi një nga momentet më të dhimbshme dhe më prekëse: mënyrën se si vendosi ta përcillte bashkëshorten e tij.
“I kërkova vajzës t’i bënte grimin. I thashë: ‘Mami meritonte të ikte si një nuse e bukur’. Ne të dy kemi qëndruar aty, duke qarë e duke e rregulluar. E përcollëm të bukur, siç ishte,” tregon ai.
Më pas, nisi periudha më e errët për të:
“Shumë ditë e net nuk kam dashur të jetoj. Doja t’i bashkohesha. Fëmijët më janë përgjëruar, por mungesa e saj nuk matet me asgjë.”
Llakaj foli edhe për lidhjen e tyre të veçantë, një marrëdhënie që ai e përshkruan si më të madhe se dashuria bashkëshortore. Në librin që po përgatit, “Kostandina”, ai i shkruan asaj:
“Faleminderit që nuk ma lëshove dorën kurrë. Ishim shokë të vërtetë, shokë që ziheshim, shokë që ecnim bashkë.”
Ai theksoi se pavarësisht famës, ka qenë gjithmonë një njeri i tokës, i lidhur me jetën e thjeshtë dhe njerëzit.
Rrëfimi i Agron Llakajt është një dëshmi tronditëse e dashurisë së pakushtëzuar, dhimbjes së humbjes dhe forcës që kërkohet për të vijuar jetën përballë një boshllëku kaq të madh.