Kryetarja e Kuvendit, Elisa Spiropali, deklaroi se Shqipëria është e përkushtuar ndaj integrimit në Bashkimin Europian dhe se ky proces përfshin edhe modernizimin e institucioneve, përfshirë ndërtimin e një godine të re për seancat plenare të Kuvendit.
E ftuar në News24, Spiropali theksoi se Partia Socialiste do të vazhdojë me rritjen e pagave në sektorin publik, duke ndikuar pozitivisht edhe në sektorin privat, si dhe me investimet në infrastrukturë, energji, bujqësi dhe turizëm.
Ajo shtoi se projekti për godinën e re të Kuvendit tashmë ekziston dhe se diskutimet për financimin do të nisin së shpejti.
“PS do vazhdojë me politikën e rritjes së pagave në sektorin publik dhe kjo shkakton rritje të pagave dhe tek sektori privat. Do vijojmë të zhvillojmë infrastrukturën, të vijojmë proceset energjetike të Shqipërisë, për bujqësinë, do vijojmë të investojmë për rritjen e turizmit, për mirëqenien e qytetarëve dhe prioriteti i prioriteteve është integrimi në BE. Kjo është një ëndërr, që është kthyer sot në një ardhmëri që mund të arrihet. Procesi i integrimit është një prioritet i parlamentit, pasi përafrimi i legjislacionit e bën të rëndësishëm rolin e parlamentit. Kuvendin do ta bëjmë gati për një godinë të re të seancave plenare, siç e meriton një vend që do anëtarësohet në BE. Ne një projekt e kemi dhe besojmë se së shpejti do ta diskutojmë, teksa na nevojitet financimi i duhur. Nuk e bëj këtë punë për arsye materiale, por e bëj për vokacion për të shërbyer”, tha Spiropali.