Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet për vrasjen e Fatbardh Licit dhe ka dërguar dosjen në Gjykatën e Posaçme Kundër Krimit të Organizuar (GJKKO). Të pandehurit për të cilët SPAK kërkon nisjen e gjykimit janë Safet Bajri, Behar Bajri, Astmer Bilali dhe Eria Ago.
Fatbardh Lici, i vrarë rreth shtatë vite më parë, dyshohet se ishte viktimë e konflikteve të vazhdueshme mes fiseve Lici dhe Bajri në Shkodër. Safet Bajri ishte më parë i ndaluar gjatë operacionit “Oaz” të ish-Prokurorisë për Krime të Rënda dhe kishte edhe një dënim në Belgjikë. Së fundmi, banesa e tij në Dobraç është kontrolluar disa herë nga SPAK në kuadër të procedimeve të ndryshme penale.
Konfliktet mes fiseve Lici dhe Bajri kanë filluar që nga atentati ndaj biznesmenit Lulzim Kulla në janar të vitit 2018, ku mbetën të plagosur tetë persona. Më pas, gjatë vitit 2018, ndodhën disa vrasje dhe zhdukje të lidhura me këtë konflikt, përfshirë ekzekutimin e çiftit Boran Bërçana dhe Silva Ndoci, vrasjen e Fatbardh Licit më 10 gusht dhe zhdukjen e shtetasve Agron Mollaj dhe Gëzim Hysa.
Saga e vrasjeve vijoi gjatë viteve të mëvonshme me atentate ndaj Arjan dhe Fatos Ferracakut, Ferdinand Polisë dhe Endri Mustafës. Sipas SPAK, disa nga këto ngjarje lidhen drejtpërdrejt me përplasjet mes grupeve Bajri-Lici.
Safet Bajri u arrestua më 21 shkurt 2025 dhe ndaj tij dhe bashkëpunëtorëve rëndojnë akuza për “vrasje me paramendim”, “grup i strukturuar kriminal” dhe kryerjen e veprave penale nga organizata kriminale. SPAK ka përzgjedhur prova për të dokumentuar ekzekutimin e Fatbardh Licit, ndërsa motivi dyshohet se lidhet me hakmarrjen e Bajrëve pas vrasjes së ish-efektivit Boran Bërçana.